AZAFADY, Tsy fantatro mihitsy IANAREO…

AZAFADY, Tsy fantatro mihitsy IANAREO…

« MANDEHANA MANOMPO ILAY NOTOMPOINAREO TEO ALOHA… »

IZANY NO HOLAZAIN’ I JESOSY AMIN’ OLONA MARO AMIN’ NY ANDRO FARANY.

Nanonofy ny amin’ny andro fi­tsarana amin’ny andro farany ny mpino kristiana mpanara-pomba iray ka nahita olona an-tapitrisany maro miankohoka mivavaka. Nanifikifika ny lohany tamin’ alahelo Jesosy Kristy Mpamonjy ary izao no teny reny nambaran’i Jesosy : « Azafady tsy fantatro ianareo… mandehana manompo ilay notompoinareo teo aloha… »

Milaza amintsika ny Baiboly fa mpanompon’ izay ankatoavintsika isika. Hoy ny Rom. 6 : 16. « Tsy fan­tatrareo ve fa raha manolo-tena ho mpanompo ianareo na ho an’iza na ho an’iza dia mpanompon’ izay anka­toavinareo, na ny ota ho amin’ ny fa­hafatesana na ny fankatoavana ho amin’ny fahamarinana ».

Mampianatra antsika io andininy ao amin^‘ny Baiboly io fa mpanom­pon’izay ankatoavintsika eto amin’izao fiainana izao isika.

Raha mankatò ny devoly sy manota isika, dia tonga mpanompon’ny devoly, fa raha mankatò ny tenin’Andriamanitra dia mpanompon’An­driamanitra.

Amin’ny farany, amin’ny andro fitsarana, dia an-tapitrisany no handre ny fitsarana farany fa tsy nahalala azy mihitsy Jesosy, na nanana fiom­bonana taminy… Kristiana mpanara­pomba fotsiny izy ireo.

Nankatò ny devoly izy ka niaina tao amin’ ny fahotana sy tsy nankatò an’Andriamanitra… ka dia zanaky ny devoly izy…  ary dia tsy mahazo miditra ny lanitra izy fa alefa any amin’ ny helo izay misy ny devoly notompoiny teo aloha tety an-tany.

Nitohy ilay nofy dia namaly ireo olona an-tapitrisany ka nanao hoe : Tompo ô, Kristiana foana anie izahay hatramin’ izay é, ary natao batisa sy nanome fanatitra tao am-piangonanao ! Nijery ny Bokin’ ny fiainana Jesosy ary nanifikifika ny lohany tamin’ alahelo indray Izy, raha nape­traky ny anjely teo ankavia ireo ary nanifikifika ny lohany tamin’alahelo indray Jesosy, dia hoy Izy : « Aza­fady, TSY FANTATRO MIHITSY IANAREO, mandehana manompo ilay efa notompoinareo teo aloha… » dia notarihin’ ny anjely ireo olona an­-tapitrisany ireo ho any amin’ ny anja­rany mandrakizay any amin’ ny helo.

Ao amin’ ny Baiboly dia vakiant­sika izay nolazain’ i Jesosy tamin’ ny Fariseo izay tonga nanatona Azy sady niteny taminy fa zanak’ i Abra­hama izy.

Aoka ho vakiantsika izay lazain’ ny Baiboly. (Jao. 8 : 33-39) « Ary ireo namaly Azy hoe : taranak^‘i Abrahama izahay, ary tsy mbola an-devon’olona mihitsy ; nahoana no ataonao hoe : Ho afaka ianareo ?

Namaly azy ireo Jesosy hoe : Lazai­ko aminareo marina dia marina tokoa, izay manota dia mpanompon’ ny ota. Ary ny mpanompo tsy mitoe­tra ao an-trano mandrakariva ; fa ny zanaka no mitoetra ao mandrakariva. Raha ny Zanaka no hahafaka anareo dia ho afaka tokoa ianareo. Fantatro fa taranak’ i Abrahama ianareo ; nefa mitady hamono Ahy ianareo satria ny teniko tsy manana toerana ao amina­reo. Izay hitako tamin’ny Raiko no lazaiko, ary ianareo kosa manao izay hitanareo tamin’ny rainareo. Dia na­maly ireo ka nanao taminy hoe : Abrahama no rainay.

Hoy Jesosy taminy : Raha zanak’i Abrahama ianareo dia ny asan’i Abrahama no hataonareo ».

Ry mpamaky malala, aza mety hofitahina.

Mazava ny tenin’Andriamani­tra… izay maha-izy anao ankehitriny no toerana hisy anao sy izay ho toe­tranao any amin’ ny mandrakizay. Nambaran’i Jesosy mazava tamin’ny mpihatsaravelatsihy sy ny Fariseo ao amin’ny and. 44 hoe « zanaky ny de­voly rainareo ianareo, ary ny filàn’ny rainareo no ataonareo ». Ny fanao­vana fampiharana ny fombafombam­pivavahana kristiana, ny maha-vita batisa, ny fanatrehana fivoriam-pian­gonana ara-dàlana ary ny famakiana Baiboly indraindray dia tsy manorina mpino marina sy finoana marina an’ i Jesosy izay mamonjy ny fanahinao. Ny finoana marina an’i Jesosy dia manova ny fon’ny olona sy ny fiton­drantenany… hanova ny fomba fiai­nany…

Ny finoana marina an’Andriama­nitra dia mahatonga ny olona hataho­tra an’Andriamanitra, ary izany taho­tra izany no mahatonga azy hankatò ny didin’Andriamanitra sy ho tia an’Andriamanitra ary hanompo Azy amin’izao fiainana izao…

Koa dia nifarana ilay fahitana tamin’ny fanehoana fa na iza na iza tsy voasoratra tao amin’ny Bokin’ny fiainana dia natsipy tany amin’ny fa­rihy afo (Apo. 20 : 15). Tsy fombam-­pivavahana akory ny maha-kris­tiana… fa fiainana izay raisintsika avy amin’Andriamanitra ary ny fiai­nan’Andriamanitra monina ao ana­tintsika izay manova antsika hatrao anaty ka hatrety ivelany… dia mo­nina ao am-pontsika sy ao anatintsika Jesosy. Monina ao anatintsika ny Fanahy Masina… izany no nolazain’i Jesosy. « Raha tia Ahy ianareo, dia ho tia anareo ny Ray, ka honina ao anatinareo izahay »… Hoy Jesosy hoe : « Mitsangana eo am-baravarana Aho », (ny fo sy ny sitrapon’ny olona no varavarana), raha misy mamoha dia hiditra Izy ka hitondra ny fita­hiany.

Fahatsapana marina izay ananan­tsika eto an-tany izany.

Hoy Jesosy tamin’i Nikodemosy: « Tsy maintsy ateraka indray iana­reo… » dia nohazavain^‘i Paoly ny fomba hahavoavonjy ao amin’ny (Tit. 3:3-7).

« Fa isika koa dia adala fahiny, tsy nankatò, voafitaka, andevon’ny filàna sy ny fahafinaretana maro, ni­velona tao amin’ny lolompo sy ny fialonana, sady hala no nifankahala. Fa taorian’ izany dia niseho ny faha­moram-panahy sy ny fitiavan’Andriamanitra Mpamonjy antsika, tsy avy tamin’ny asan’ny fahamarinana izay nataontsika, fa araka ny famin­drampony no namonjeny antsika, tamin’ny fanasan’ny fiterahana in­dray sy ny fanavaozan’ny Fanahy Masina, izay naidiny betsaka amin­tsika tamin’ny alalan’i Jesosy Kristy Mpamonjy antsika ; mba hohamari­nina amin’ny fahasoavany isika, ka ho tonga mpandova araka ny fanantenana ny fiainana mandrakizay ».

Lazainy ao amin’ny and. faha-3 izay nisy antsika sy izay misy an­tsika. Ny and. faha-4 dia milaza ny fahamoram-panahin’Andriamanitra sy ny fitiavany ny olona.

Ny and fana-5 dia milaza amin­tsika fa tsy amin’ny asa tsara ataon­tsika no mahamendrika antsika ha­hazo ny famonjena… fa noho ny famindrampony amin’ny alalan’ny fibebahana sy ny fahaterahana in­dray… ateraka indray amin’ny alalan’ny Fanahy Masina izay manavao ny toetrantsika sy ny fanahintsika ary ny fiainantsika.

Mamela antsika Izy sady mana-marina antsika, manome famelan-ke­loka feno sy manome antsika ihany koa fandovàna ny fiainana mandraki­zay… Izany rehetra izany dia noho ny famindrampon’Andriamanitra sy ny fahasoavan’Andriamanitra mai­maim-poana tamin’ny alalan’ny faha­mendrehan’i Jesosy Kristy Zanany, satria nisolo toerana antsika teo amin’ny hazofijalian’i Kalvary Jesosy, nisolo voina ny famaizana ny otantsika Izy, dia nekena isika ary voavela noho ny Aminy… amin’ny alalan’ny fepetra iray: Raha mibebaka sy man­dray ny fitiavany isika…

Fa tsy mety ho voavonjy isika raha mitohy mivelona amin’ny ota sy ny lainga ary ny karazam-paharat­siana rehetra… Nitory Jesosy hoe : MIBEBAHA… Niteny tamin’ny Apostoly Izy mba hitory ny fibeba­hana satria masina Andriamanitra, ka tsy azontsika atao ny hanana ny Tompo ao amin’ny fiainantsika ao anatin’ny fiainam-pahotana.

Manomboka eto amin’ity izao tontolo izao ity ny fiainana mandra­kizay ary mahazo ny fiainana mandrakizay isika raha mibebaka sy mi­tohy mivelona amin’ny fiainana masina. Inona ny fibebahana ? Ny fialana tanteraka amin’ilay fomba fiainantsika teo aloha, mitsahatra amin’ny lainga, manitsy ny diso ho marina, mamerina izay nosamborina, sns…

Azo atao izany, mibebaka fotsiny isika dia manolotra ny fiainantsika sy ny fontsika ho an’i Jesosy dia ovany isika sady vonjeny. Mitsidiha ny fiangonana Jesosy Mamonjy dia ho faly izahay hanampy anao, hiaraka hivavaka aminao sy ho anao mandra­-pahavoavonjy anao ka hizotra man­kany an-danitra sady hanana ny tena fahasambarana.

Raha nahasoa anao ity Trakta Ity dia manasa anao Izahay hana­tona sy hanaraka ny fivoriana Izay atao ao amin’ny fiangonana « Jesosy Mamonjy » akaiky anao mba ahazoa­nao mandre ny fanazavana ny Tenin’Andriamanitra sy ahazoana manome torohevitra anao.