Namoy Raiamandreny ny Fiangonana Jesosy Mamonjy
Amin’ny Finoana sy Fanantenana ny Fitsanganan’ny tena amin’ny maty no ampandrenesana antsika ny fahalasanan’ny Mpanompon’Andriamanitra
RAFALIMINO Raymond
Mpanompon’Andriamanitra
PCA Fiangonana Jesosy Mamonjy teo aloha
Ny Ekipan’ny Lalamasaka Hatry ny Ela dia mirary fiononana ho an’ny ankohonany sy ny fianakaviany, ary ny Fianakaviam-ben’ny Fiangonana Jesosy Mamonjy, Ny Vondrona Mpitoriteny Evanjelistra Jesosy Mamonjy MEJM.
Efa nitondra fiangonana maro izy, nandika teny ny Mpanorina, nampianatra tao amin’ny fivorian’ny tanora, ary efa Filohan’ny Filankevim-pitantanana teto amin’ny Fiangonana Jesosy Mamonjy. Ary rehefa nandao ny asany amin’ny maha Talen’ny Jirama azy dia nametrahan’ny Raiamandreny tanana hitondra teo amin’ny Foibe Ankorondrano sy manerana an’i Madagasikara.
Anisan’ireo sangany sy nampiroborobo ny asa fitoriana Filazantsara nentin’ny Mpino izy, hatramin’ny fahatanorany. Isan’ireo notendren’ny Raiamandreny Mpanorina izy hampivelatra ny fitoriana sy fananganana Fiangonana manerana an’i Madagasikara, ary nanolotra sy nanome betsaka tokoa na ny fanaovana ny sezam-piangonana, teto amin’ny Foibe Ankorondrano na tamin’ny fiangonana izay naorin’i Fr Daoud mivady. Ijoroany vavolombelona amin’ny tanora mandrakariva ny nandehanany nanokatra fiangonana, sy nitondra fiangonana, mandeha bisikileta am-polony kilometatra maro isan-kerinandro, raha mbola mpianatra rizareo…
Ny Fiangonana Jesosy Mamonjy Tsarafara Sabotsy Namehana no Fiangonana farany nentiny, nanao fanitarana, ary nanangana ny Sekoly Jane Collins tao, mialohan’ny tsy fahasalamany.
Maro ireo Mpino nampiasain’Andriamanitra ho ohatra sy modely teto amin’ny Fiangonana Jesosy Mamonjy manerana ny Nosy sy any ivelany, fa izy dia anisany naneho tamin’ny asany fa azon’ny Mpino atao, indrindra ny Tanora, ny ho hampiasain’Andriamanitra amin’ny asa fanompoana rehetra, na asa Fitandremana, na asa fitantanana, na ny fahalalan-tanana ho amin’ny asa rehetra, indrindra ny fanorenana Fiangonana.
Noho izany dia sitrakay ny hanome voninahitra ny herimpony, sy ny asa vitany napetrany ho an’ny Fiangonana.
Jesosy anie hameno ny banga ary hampahery anareo ankohonany.
